Ögmundur Jónasson:
Hæstv. forseti. Hér segir: ,,Forstjóri skal hafa lokið háskólaprófi.`` Í heilaskurðlækningum, í dönskum málvísindum, í guðfræði, í lögfræði, í verkfræði? Þessi dýrkun löggjafarsamkundunnar á háskólagráðum er farin að ganga algerlega út í öfgar. Það virðist ekki lengur vera hægt að koma saman nefnd sem í starfi sínu þarf að styðjast við lagatexta nema Alþingi krefjist þess ekki að í henni sitji a.m.k. einn hæstaréttarlögmaður, alla vega einn lögfræðingur, líkt eins og menn trúi því að allir aðrir séu ólæsir á lög, ef ekki þá bara ólæsir almennt. Það eru menn ekki fremur en að háskólamenntun tryggi góða stjórnunarhæfileika. Reyndar er stjórnun ekki kennd í flestum námsgreinum háskólans. Þess vegna er fráleitt að krefjast óskilgreindrar háskólamenntunar sem skilyrði fyrir því að einstaklingur geti gegnt stjórnunarstarfi hjá hinu opinbera.