Fyrirspyrjandi (Hjálmar Jónsson):
Herra forseti. Ég beini fyrirspurn til hæstv. fjmrh. um innheimtu þungaskatts á stórum bifreiðum með tilkomu ökurita. Nú hef ég um það upplýsingar að verulegur árangur hafi náðst í bættri innheimtu þungaskatts. Þannig hafi verulegir fjármunir skilað sér sem auknar tekjur í Vegasjóð og mér leikur forvitni á að vita hversu mikið. Þegar þessi breyting var gerð á síðasta ári varð vart nokkurrar óánægju meðal eigenda flutningabifreiða og sendibíla því að auk fyrirhafnar sem fylgdi breytingunni þurftu þeir að greiða fyrir ökurita í hvern bíl, kostnað sem var á bilinu 70--100 þús. kr. ef ég hef náð því rétt. Mér þykir því ástæða til að fá fram upplýsingar um hvort aðgerðin hafi ekki skilað árangri. Spurningin er þannig:
,,Hvaða árangur hefur náðst í innheimtu þungaskatts af stórum bifreiðum með tilkomu ökurita?``