[prenta uppsett í dálka] 128. fundur
Ögmundur Jónasson:
Hæstv. forseti. Verið er að greiða atkvæði um málskotsnefnd sem hefur endanlegt úrskurðarvald í málefnum lánasjóðsins og er þannig sett yfir stjórn sjóðsins. Í nefndinni eiga að vera þrír menn og inn í hana má enginn koma nema hann hafi lokið prófi í lögfræði. Þetta er dæmi um hvernig sérfræðingaveldið er að þrengja að lýðræðislegu starfi og lýðræðislegum sjónarmiðum. Álitamál og ágreiningsmál, sem koma upp í Lánasjóði ísl. námsmanna, eru ekki bara lögfræðilegs eðlis, enda hægur vandinn að leita sérfræðiálits í þeim efnum heldur einnig mannlegs eðlis og prófgráður eru engin ávísun á réttlátt úrskurðarvald. Ég hvet til þess að þetta ákvæði verði endurskoðað og endurmetið en eins og það stendur greiði ég atkvæði gegn því.
