[prenta uppsett í dálka] 7. fundur
Flm. (Unnur Stefánsdóttir):
Herra forseti. Ég þakka hv. þm. fyrir að taka þátt í umræðum um þessa tillögu og get tekið undir flest af því sem þeir hafa sagt í sambandi við málið. Ég vil bæta við að umhverfi okkar hefur breyst svo gríðarlega á síðustu árum að það er orðið allt annað. Mín reynsla er sú að það er nánast eingöngu á landsleikjum sem ég heyri þjóðsönginn leikinn og ég lýsti áhrifunum sem hann vekur við slík tækifæri.
Þegar ég var krakki var þjóðsöngurinn alltaf leikinn í lok útvarpsdagskrár og svo síðar í sjónvarpsdagskránni. Mér er tjáð að þetta sé alveg niðurlagt þannig að þarna hefur líka orðið breyting. Og ég vil ítreka það að ég vil frekar að löggjafinn taki á þessu máli og breyti og komi með annan söng við hliðina á núverandi þjóðsöng heldur en að fólk fari að hætta að nota hann meira eða minna.
