Menntamálaráðherra (Björn Bjarnason) (andsvar):
Herra forseti. Ég er sammála því að menntunin er besta fjárfestingin sem við okkur blasir hér á landi eins og annars staðar. En spurningin er sú hvernig þessum fjármunum er best varið. Er þeim best varið þegar þeir eru takmarkaðir með því að verja þeim í Lánasjóð ísl. námsmanna eða standa að þeim skólastofnunum sem starfandi eru? Þegar þarf að gera upp á milli og forgangsraða innan menntakerfisins þarf að taka ákvarðanir um slíka hluti. En sú ákvörðun hefur verið tekin á undanförnum árum að hlúa frekar að stofnunum, skólunum, en að auka útgjöld lánasjóðsins sem hvort um sig var komin í algerar ógöngur með því kerfi sem gildandi var. Þetta er skólastefna og menntastefna sem var mótuð og liggur fyrir um forgangsröðun við ráðstöfun á fjármunum til menntamála. Tekin var ákvörðun um að hlúa frekar að skólunum en lánasjóðnum ef menn vilja stilla málunum þannig upp og síðan tekið á málefnum lánasjóðsins þannig að hann er kominn í gott horf núna eins og hv. ræðumaður hefur bent. Þetta var markviss stefna og ekki unnt að segja annað en að henni hafi verið fylgt fram.
Nú kemur einnig í ljós að verið er að auka fjárframlög til háskólastigsins eins og kemur fram í fjárlagafrv. Það er verið að auka fjárframlög til jöfnunar námskostnaðar sem einnig er styrkur við nemendur þótt þeir séu ekki á háskólastigi eins og kemur fram í fjárlagafrv. þannig að verið er að fikra sig í þá átt að auka fjárveitingar með þessum hætti.