[prenta uppsett í dálka] 10. fundur
Össur Skarphéðinsson (andsvar):
Herra forseti. Það hlýtur að vera raun þeim virðulega forseta sem núna stýrir þessum fundi, af því að hann tilheyrir Framsfl., að þetta er í annað skipti sem þingmaður Framsfl. fer undan á hörðum flótta frá eigin ummælum. Hæstv. heilbrrh. kemur hér upp og heldur því fram að hún hafi ekki átt við það að hæstv. fjmrh. hafi farið á svig við lögin með því að setja þessar reglur. Eigi að síður liggur það fyrir að hæstv. heilbrrh. hefur fimm sinnum í dag óskað eftir því að heilbr.- og trn. Alþingis taki til rannsóknar þessar reglur sem hæstv. fjmrh. hefur sett og hún hefur tiltekið hvað nefndin á að rannsaka. Það á að rannsaka hvort það sé nauðsynlegt lögum samkvæmt að auka fjölda þeirra sígarettutegunda sem þurfa að koma á markaðinn. Með öðrum orðum, hæstv. heilbrrh. er ekki viss um að það sé rétt sem hæstv. fjmrh. sagði í dag, að það yrði að gera þetta vegna gildandi laga. Það er ekki hægt að skilja þessi orð öðruvísi en svo að hæstv. heilbrrh. vilji fá hv. heilbr.- og trn. til þess að vega, meta og rannsaka og að lokum kveða upp sinn úrskurð um það hvort hæstv. fjmrh. hafi brotið lögin eða ekki.
(Forseti (GÁ): Forseti vill taka fram vegna orða hv. þm. að forseti er hér einungis að gera skyldu sína.)
