Utanríkisráðherra (Halldór Ásgrímsson):
Herra forseti. Með orðsendingu dagsettri 25. mars 1985 frá sendiherra Bandaríkjanna á Íslandi til Geirs Hallgrímssonar, þáv. utanrrh., óskaði Bandaríkjastjórn formlega eftir samþykki ríkisstjórnar Íslands fyrir áformum Atlantshafsbandalagsins um endurnýjun ratsjárstöðvakerfisins á Íslandi með það fyrir augum að treysta loftvarnir landsins. Á þessum tíma voru einungis tvær ratsjárstöðvar starfræktar á Íslandi, stöðin á Stokksnesi við Hornafjörð og stöðin á Sandgerðisheiði sem gengur undir nafninu Rockville. Þessar stöðvar gátu með engu móti fylgst með flugumferð fyrir norðanverðu landinu. Í stað þess gerðu Atlantshafsbandalagið og bandaríski flugherinn út sérstakar ratsjárflugvélar, svonefndar AWACS-vélar, sem stöðugt voru á flugi yfir Íslandi.
Í kjölfar samþykktar ríkisstjórnar Íslands vorið 1985 um endurnýjun ratsjárstöðvanna fjármagnaði Mannvirkjasjóður Atlantshafsbandalagsins byggingu fjögurra nýrra stöðva, á Sandgerðisheiði, á Bolafjalli við Bolungarvík, á Gunnólfsvíkurfjalli á Langanesi og á Stokksnesi. Rekstur þessara ratsjárstöðva er kostaður af bandaríska flughernum en rekstur þeirra annast Ratsjárstofnun. Viðhald og framkvæmdir við þær eru hins vegar fjármagnaðar af Mannvirkjasjóði Atlantshafsbandalagsins þar sem stöðvarnar eru hluti af varnarviðbúnaðarkerfi bandalagsins.
Í áðurnefndri orðsendingu sendiherra Bandaríkjanna til utanrrh. var jafnframt tekið fram að Bandaríkjastjórn mun í kjölfar byggingu ratsjárstöðvanna sjá um að sett verði upp siglingaratsjá við norðurstöðvarnar, þ.e. á Bolafjalli og á Gunnólfsvíkurfjalli. Tekið var fram í orðsendingu sendiherrans að uppsetning siglingaratsjárinnar yrði viðbót við ratsjárstöðvaframkvæmdir Atlantshafsbandalagsins. Siglingaratsjá þessi er sérstakt tæki til að fylgjast með umferð sæfarenda og dregur um 70 sjómílur frá landi. Af þessari framkvæmd hefur ekki orðið enn. Byggingu ratsjárstöðvanna lauk og þær tóku til starfa á árunum 1992 og 1993. Ratstjárstöðvaverkefninu verður þó ekki lokið að fullu fyrr en sérstök hugbúnaðarstöð tekur til starfa á Keflavíkurflugvelli um mitt næsta ár.
Þegar Bandaríkjastjórn sóttist eftir fjármögnun fyrir siglingaratsjánum árið 1992 í Mannvirkjasjóð NATO var kalda stríðinu lokið. Sovétríkin höfðu liðast sundur og ný heimsmynd blasti við. Siglingaratsjá var þá ekki lengur talinn hluti af nauðsynlegum varnarviðbúnaði á Íslandi og fjármögnun til framkvæmdarinnar hefur ekki fengist úr Mannvirkjasjóðnum af þeim sökum. Bandaríkjastjórn hefur fyrir beiðni íslenskra stjórnvalda sótt ítrekað um fjármagn til framkvæmdarinnar en framganga málsins hefur strandað á neikvæðri afstöðu ákveðinna aðildarríkja að Mannvirkjasjóðnum. Íslensk stjórnvöld telja að máli þessu sé ekki lokið og verður reynt áfram til þrautar að fá samþykki Mannvirkjasjóðsins fyrir framkvæmdinni.