Guðmundur Hallvarðsson:
Herra forseti. Ég vil þakka hv. 1. þm. Vestf., fyrir að koma með þessa fyrirspurn. Í svari hæstv. menntmrh. komu fram athyglisverðar upplýsingar.
Á 20. þingi Sjómannasambands Íslands fór allmikill tími í umræðu um þetta málefni og það hefði kannski verið gott ef þingið hefði verið upplýst um þessa stöðu mála. Hitt er annað mál að það komu líka fram á sjómannasambandsþinginu umræður um það hvort ekki væri eðlilegt að nota þann búnað sem nú er til bæði á Gunnólfsvíkurfjalli og Bolafjalli en fullyrt er að þangað upp liggi ljósleiðari sem hljóti þá að afmynda þær tölur sem hér voru lagðar fram.
Það var athyglisvert líka að hlusta á það að síðast hefði þetta verið reiknað út 1974 varðandi sjónvarpið, en ég vænti þess að menntmrh. vinni áfram að þessu máli því að eins og kom fram í hans máli eru allar tölur í þessu dæmi orðnar svo afstæðar miðað við þá tækni sem nú er orðin.