[prenta uppsett í dálka] 32. fundur
Heilbrigðisráðherra (Ingibjörg Pálmadóttir) (andsvar):
Virðulegi forseti. Það kom fram í máli hv. þm. Ástu B. Þorsteinsdóttur að Alþfl. hefur hopað í tilvísanamálinu og talar nú um sjúkrasamlag. Þó svo að við kæmum á sjúkrasamlagi þá kemur það ekki beint tilvísanakerfinu við þannig að ég heyri að Alþfl. er ekki lengur með tilvísanakerfið á sinni stefnuskrá. Ég sakna þess ekkert sérstaklega vegna þess að ég hef áhuga á að koma á valfrjálsu stýrikerfi.
Hvað það varðar að ekkert átak hafi verið gert í biðlistamálum þá minni ég á þær 40 milljónir sem sérstaklega voru settar í hjartaaðgerðir á Landspítalanum á sl. ári til þess að létta á biðlistunum. Og sem betur fer þurfa ekki allir sem fara í hjartaþræðingu að fara í hjartaaðgerð.
Um þá miklu framsækni sem gigtarlæknar hafa sýnt á Landspítalanum þá er það alveg rétt. En fyrir þremur árum lagði sú sem hér stendur fram þáltill. um rannsóknir á gigtarsjúkdómum sem var samþykkt hér á Alþingi og eftir henni hefur verið unnið.
Ég ætla að minna á nokkur atriði sem við höfum náð geysilegum árangri í bara á þessu ári. Við höfum enduruppbyggt gjörgæsludeild á Landspítalanum. Opnuð hefur verið ný glasafrjóvgunardeild og ný göngudeild krabbameinssjúklinga. Rannsóknastofan sem hér var áður getið. Hjartaaðgerðir barna verða fluttar heim. Þannig er ágætt að minna á það í þessari umræðu að sem betur fer erum við á réttri leið.
