Sjávarútvegsráðherra (Þorsteinn Pálsson) (andsvar):
Herra forseti. Vegna athugasemda hv. 4. þm. Norðurl. e. um fjölda rannsóknaskipa og þá stefnumörkun sem fram kemur í athugasemdum með frv. þar að lútandi, er rétt að taka fram að ráðuneytið byggði frv. á þeirri stefnumörkun sem fram kemur hjá stjórn stofnunarinnar. Það getur vissulega leitt til nokkurra vandkvæða, einkanlega varðandi innfjarðarannsóknir, en niðurstaða manna er sú að ekki eigi að valda neinum teljandi örðugleikum að skipuleggja þær rannsóknir með leiguskipum.
Um þær athugasemdir hv. þm. sem lutu að úreldingu fiskvinnsluhúsa er þess að geta að í lögunum er skýr greinarmunur gerður á úreldingu fiskvinnsluhúsa annars vegar og fiskiskipa hins vegar. Þær reglur sem settar eru í lögunum um úreldingu fiskiskipa byggja á sjálfkrafa rétti þeirra sem fullnægja ákveðnum skilyrðum og óska eftir úreldingu. Hins vegar gera lögin ekki ráð fyrir því þegar um fiskvinnsluhús er að ræða að þar sé sjálfkrafa réttur. Það byggist á mati stjórnar stofnunarinnar og það var eðlilegt að minni hyggju að stjórnin reyndi að setja almennar reglur þar um. En það er mjög mikilvægt að menn geri sér grein fyrir því að þarna var reginmunur að þessu leyti, að annars vegar var um sjálfkrafa rétt að ræða og hins vegar rétt sem háður var mati stjórnar sjóðsins. Það er svo höfuðskylda stjórnarinnar að gæta þess að halda útgjöldunum innan við fjárhagsrammann. Ég geri ráð fyrir því að verklagsreglurnar hafi tekið mið þar af. Nú kann það að vera að fjárhagsramminn rýmkist eitthvað miðað við að búið er að framlengja gjaldtökutímabilið og það verður þá mat stjórnarinnar hvort það gefur (Forseti hringir.) tilefni til þess að rýmka eitthvað reglurnar nú, eins og hv. þm. minnti á, en það er mat stjórnarinnar sem þar þarf að liggja fyrir.