[prenta uppsett í dálka] 51. fundur
Ágúst Einarsson:
Herra forseti. Hér er að hefjast atkvæðagreiðsla um svokallaðan bandorm. Hann einkennist af ranglátri stefnu ríkisstjórnarinnar að mati okkar stjórnarandstæðinga og bitnar á mennta-, heilbrigðis- og félagsmálum framar öðru. Stjórnarandstæðingar standa saman í þessu máli. Þeir hafa skilað sameiginlegu nefndaráliti og gert skilmerkilega grein fyrir afstöðu sinni í þeirri umræðu sem hefur verið bæði í dag sem og við 1. umr. Við munum gera grein fyrir afstöðu okkar gagnvart einstökum greinum þegar kemur að þeim í atkvæðagreiðslunum, en hér er verið að greiða atkvæði um að skerða lögbundinn tekjustofn til Þjóðarbókhlöðu og við erum andvíg því ákvæði.
