Ferill 399. máls. Aðrar útgáfur af skjalinu: Word Perfect.
1996–97. – 1066 ár frá stofnun Alþingis.
121. löggjafarþing. – 399 . mál.
791. Svar
dómsmálaráðherra við fyrirspurn Margrétar Frímannsdóttur um framkvæmd laga um fangelsi og fangavist.
Á landinu eru 138 fangapláss í fimm fangelsum. Þau eru:
Í fangelsinu á Litla-Hrauni er aðstaða til vinnu góð eftir að nýr vinnuskáli var tekinn í notkun og eldra atvinnuhúsnæði endurbætt. Helstu þættir fangavinnunnar eru steypuvöruframleiðsla, bílnúmeragerð, framleiðsla á vörubrettum, samsetning og glerjun glugga, öskjuframleiðsla, kortagerð úr endurunnum pappír, járnsmíði, skrúfubútaframleiðsla og línuuppsetning, auk starfa við ræstingu, þvotta og viðhald húsa og lóðar.
Í Hegningarhúsinu í Reykjavík er engin sérstök aðstaða til vinnu.
Í fangelsinu Kópavogsbraut 17, Kópavogi er aðstaða til vinnu. Þar er m.a. þvottahús sem annast þvotta fyrir fangelsin í Reykjavík. Þá er unnið að ýmsum smáverkefnum.
Í fangelsinu Kvíabryggju er góð aðstaða til vinnu.
Í fangelsisdeildinni á lögreglustöðinni á Akureyri er engin sérstök aðstaða til vinnu.
Á Litla-Hrauni stunduðu 42 fangar vinnu þann 11. mars 1996.
Í Hegningarhúsinu hafa tveir fangar vinnu við ræstingar, þrif og önnur tilfallandi störf í fangarými.
Í fangelsinu Kópavogsbraut 17, Kópavogi voru sjö vinnandi fangar 11. mars 1997.
Á Kvíabryggju vinna allir fangar.
Í fangelsisdeildinni á Akureyri starfar einn fangi við þrif á sameiginlegu fangarými.
Þann 1l. mars 1997 voru afplánunarfangar 118, gæsluvarðhaldsfangar tíu og þrír afplánuðu vararefsingu fésekta. Af þeim stunduðu um 80 vinnu eða nám í fangelsunum. Sex fangar voru utan fangelsa í vinnu, fjórir í áfengismeðferð og tveir á sjúkrahúsi. Um 70% fanga voru því í vinnu, námi eða á sjúkrastofnun. Sumir fangar eru ekki vinnufærir og öðrum er ekki haldið til vinnu vegna agabrota í fangelsinu. Atvinnuástand er verst í fangelsunum á höfuðborgarsvæðinu og á Akureyri. Þann 11. mars 1997 var 31 fangi vistaður í þessum fangelsum. Af þeim voru tíu með einhverja vinnu og einn á sjúkrastofnun. Miðað við að allir aðrir sem vistaðir eru í fangelsunum á höfuðborgarsvæðinu og á Akureyri séu vinnufærir vantar vinnu fyrir 20 fanga. Þótt atvinnuástand sé almennt þokkalegt á Litla-Hrauni og Kvíabryggju koma tímabil þar sem erfitt er að finna vinnu við hæfi hvers og eins. 11. mars 1997 voru 18 fangar á Litla-Hrauni án vinnu af persónulegum ástæðum eða vegna þess að þeir voru óvinnufærir eða gátu ekki unnið vegna agabrota. Í því fangelsi er algengt að tveir til fjórir fangar séu ekki í vinnu fyrstu dagana eftir komu í fangelsið þar sem ekki eru ávallt í boði störf við hæfi hvers og eins.
Á Litla-Hrauni er tímakaup fanga 175–250 kr. og er þá tekið mið af arðsemi vinnunnar og vinnuhæfni fanga. Þeim föngum sem stunda nám eru einnig greidd laun.
Í Hegningarhúsinu í Reykjavík og fangelsinu Kópavogsbraut 17, Kópavogi er tímakaup fanga 175 kr. á klst.
Á Kvíabryggju er vinnan að hluta til ákvæðisvinna og geta fangar þá haft á bilinu 350–700 kr. á tímann. Þegar ekki er ákvæðisvinna er tímakaup 200 kr.
Í fangelsum er ekki staðið skil á launatengdum gjöldum, en á Kvíabryggju er greitt gjald til verkalýðsfélagsins á staðnum.