Margrét Frímannsdóttir:
Virðulegi forseti. Það er vissulega dálítið óvanalegt að þegar óskað er eftir flýtimeðferð í þinginu segi stór hópur þingmanna nei. En þetta mál er þannig til komið að í langan tíma hafa sjómenn átt í kjaradeilu, m.a. vegna þess að lögbundinn réttur þeirra, lög sem við settum, hafa ekki verið virt. Það er stór hluti af þeirri ástæðu að þeir grípa til þeirrar nauðvarnar að fara í verkfall. Það hefur ekki af hálfu ríkisstjórnarinnar verið brugðist við því. En þegar svo er komið að þeir sjá enga aðra leið en að fara í verkfall, þá stendur ekki á viðbrögðum ríkisstjórnarinnar að setja lög á kjaradeiluna. Við skulum taka þetta mál til umræðu og láta það hafa eðlilegan framgang í þinginu en gefa okkur og þeim stéttum sem þarna eiga hlut að máli tíma til að skoða það. Ég segi nei.