Einar K. Guðfinnsson (andsvar):
Virðulegi forseti. Ég fagna því að hv. þm. hefur beðið um þessar sérstöku upplýsingar varðandi áhrif mismunandi kosningakerfa á möguleika kvenna til að hljóta kosningu til Alþingis og sveitarstjórna. Ég er sammála hv. þm. um að þetta er algert grundvallaratriði ekki síst í ljósi þessa plaggs sem við ræðum hérna. Því vil ég spyrja hv. þm. hvort hún sé ekki sammála mér um það að forsenda þess að hægt sé að ljúka vinnu að endurskoðun kosningalagafyrirkomulagsins sé að þessar upplýsingar liggi fyrir og menn séu, þegar tillögur nefndarinnar verða lagðar fram, alveg klárir á því hvaða áhrif það hefur á möguleika kvenna til þess að hljóta kjör á Alþingi eða í sveitarstjórn.
Erum við ekki sammála um að mikilvægt sé að efla hlut kvenna í stjórnmálum? Erum við ekki sammála um að mikilvægt sé að hlutur kvenna verði stærri á Alþingi heldur en er í dag? Erum við ekki sammála um að við viljum ekki verða eftirbátar Norðurlandaþjóðanna hvað þetta áhrærir? Er þá ekki alveg ljóst, þegar við erum að taka ákvarðanir um grundvallaratriði eins og kosningalagafyrirkomulagið, að kosningalögin í sjálfu sér bæti hlut kvenna að þessu leyti? Getum við þá gengið frá kosningalagafyrirkomulagi eða tillögum að breyttri kördæmaskipan án þess að vera alveg viss um það að þessar nýju tillögur hafi tilætluð áhrif? Er þá ekki alveg ljóst að til þess að þetta sé hægt verði að fara fram sérstök úttekt á íslenskum forsendum? Auðvitað eru kosningalög mjög misjöfn, kosningakerfi eru misjöfn, kjördæmaskipun er hefur mismunandi áhrif. Við verðum að skoða þetta í ljósi íslensks veruleika.