Tómas Ingi Olrich:
Herra forseti. Ég tek undir það sem kom fram hjá síðasta ræðumanni að auðvitað ræður umferðin um þessar leiðir, þ.e. ljósleiðarann, miklu um hver verðlagningin er í heild. Áðan kom fram að Ríkisútvarpið nýtti ekki ljósleiðarann, þá er það rétt að Ríkisútvarpið nýtir ekki ljósleiðarann nema í hreinum undantekningartilfellum.
Þá er rétt að það komi fram að þegar sá sem hér stendur var formaður útvarpslaganefndar var farið mjög nákvæmlega ofan í þessa hluti vegna áforma Ríkisútvarpsins um að endurbæta eigið dreifikerfi. Þá kom í ljós að væri hætt við þau áform og ljósleiðarinn nýttur mundu sparast 400 millj. í fjárfestingu fyrir Ríkisútvarpið til þess að koma efni sínu til neytenda og einnig lá ljóst fyrir að öryggi og gæði flutninganna yrðu miklu meiri.