[prenta uppsett í dálka] 93. fundur, 122. lþ.
Össur Skarphéðinsson (andsvar):
Herra forseti. Eitt af þremur yfirlýstum markmiðum þessa frv. sem hæstv. landbrh. hefur mælt fyrir er að efla Fiskræktarsjóð. Í 27. gr. frv. segir svohljóðandi:
,,Þrjú prómill af óskírum tekjum vatnsaflsstöðva í landinu vegna sölu á raforku samkvæmt sérsamningum til nýrra stórnotenda.``
Í þessu felst að upphæðin sem af þessu kemur á að renna í Fiskræktarsjóð til að sinna þeim verkefnum sem hann á að standa að. Ég verð að viðurkenna, herra forseti, að mig brestur einfaldlega málskilning til þess að skilja hvað í þessu felst. Hvað felst í því að það eigi að taka 3 prómill af óskírum tekjum vatnsaflsstöðva í landinu?
Mig langar líka að spyrja hæstv. landbrh. að því hvað þetta feli í sér í tekjum. Það segir á bls. 8 í greinargerðinni, með leyfi forseta:
,,Sé tekið mið af greiðslum í Fiskræktarsjóð árið 1997 af óskírum tekjum vegna sölu raforku til almennings árið 1996 voru tekjur sjóðsins 7,7 millj. kr.``
Hvernig ber að skilja þetta? Ber að skilja þetta svo að verði þetta að lögum muni tekjur sjóðsins aukast um 7,7 millj.? Ég hef lagt mitt litla höfuð í bleyti og skil þetta ekki.
Mig langar líka til þess að spyrja hæstv. ráðherra: Þýðir þetta ekki alveg örugglega það að verði frv. samþykkt er í raunninni verið að skattleggja stóriðju í landinu um þá upphæð sem þarna á að renna í Fiskræktarsjóð?
