[prenta uppsett í dálka] 97. fundur, 122. lþ.
Steingrímur J. Sigfússon:
Herra forseti. Þegar þessi frv. koma nú til lokaafgreiðslu er rétt að undirstrika andstöðu okkar við þá lögþvingun sem hér á að fara fram. Lagasetningu sem tekur af grundvallarmannréttindi, samningsrétt og verkfallsrétt, og sviptir fjölmenna stétt í landinu þeim réttindum fram á næstu öld. Ríkisstjórn Davíðs Oddssonar hefur haldið illa á þessu máli og margt við undirbúning mála, málsmeðferð og í málflutningi hefur svo vægt sé til orða tekið minnt á skrípaleik. Alvarlegast er þó það, herra forseti, að deiluaðilum skyldi ekki takast að ljúka kjarasamningi sín í milli án utanaðkomandi íhlutunar og í friði. Það veit ekki á gott hvað varðar samskipti þessara aðila í framtíðinni. Ég ítreka vonbrigði mín með þessa niðurstöðu og greiði atkvæði gegn frv.
