Kristján Pálsson (andsvar):
Herra forseti. Ég þakka hæstv. utanrrh. fyrir svörin. Ég veit að utanrrn. hefur túlkað reglurnar um inngöngu í VES þannig að þar væri ekki um að ræða möguleika á fullri aðild þó svo að við hefðum áhuga á því eða gæfum í skyn áhuga á að fara inn sem fullgildir aðilar.
Það sem ég var að segja áðan var að í ræðu Klaus Kinkels, utanríkisráðherra Þýskalands, kom fram að þetta væri ekki spurning um að breyta þyrfti þessum reglum heldur væri þetta spurning um túlkun á þeim reglum sem þegar væru í gildi.
Ég vil hvetja hæstv. utanrrh. til að kynna sér það sem fram kom í máli utanríkisráðherra Þýskalands og kanna hvort þessi skilningur minn á því sem þarna fór fram er réttur.
Ég ætla ekki að hafa þessi orð fleiri, herra forseti.