[prenta uppsett í dálka] 113. fundur, 122. lþ.
Hjörleifur Guttormsson (andsvar):
Virðulegur forseti. Ég virði það við hvern og einn að hann breyti um skoðun og komi með ný sjónarmið. Það væri ekkert á móti því að Alþfl. lýsti því yfir að hann hefði breytt um skoðun frá því að hann fór með þessi mál. Þannig er málið ekki rekið hér. Í greinargerð með þessu frv. stendur, og það var ekki rekið til baka af þinginu með formlegum hætti í tíð hæstv. ráðherra, Eiðs Guðnasonar, en í greinargerð stendur, með leyfi forseta:
,,Enn fremur kæmi vel til greina að nefndin [þ.e. þessi samvinnunefnd til að skipuleggja miðhálendið] gerði tillögur um mörk sveitarfélaga á miðhálendinu í þeim tilvikum þar sem mörk eru á einhvern hátt óljós. Þannig yrði lagður frekari grunnur að framkvæmd og eftirliti sveitarstjórna með skipulags- og byggingarmálum á miðhálendi Íslands.``
Síðan er vikið að því að gerð hafi verið tillaga um mörk sveitarfélaga á vegum Landmælinga Íslands og embætti skipulagsstjóra 1990 og í greinargerð stjfrv. Eiðs Guðnasonar segir, með leyfi forseta:
,,Verkefni samvinnunefndarinnar verður m.a. að yfirfara þessi drög með tilliti til miðhálendisins með það að markmiði að niðurstaða fáist sem hægt verði að staðfesta á tilskilinn hátt að fenginni umsögn þeirra sveitarfélaga sem hlut eiga að máli.``
Þetta eru staðreyndir sem liggja fyrir í stjfrv. bornu fram af ráðherra Alþfl. 1992. (Gripið fram í: Samþykkt af Hjörleifi Guttormssyni.)
