Frsm. minni hluta félmn. (Rannveig Guðmundsdóttir) (andsvar):
Virðulegi forseti. Ég hef fullan skilning á afstöðu þingmannsins og því að hann óski þess að geta trúað því að þessir hlutir verði í lagi. Við höfum engan afvegaleitt. Fólk gerir sér góða grein fyrir því hvað felst í þeim frv. sem ríkisstjórnin er að afgreiða hér.
Miðhálendinu verður stjórnsýslulega skipt milli fárra. Þjóðlendufrv. er frágangur á eignarhaldi og ákvörðun um málsmeðferð þar sem ágreiningur er um eignarhald á löndum hálendisins, og það er sátt um það mál. Hér erum við ekki að deila um heilbrigðisfulltrúa eða löggæslu. Enda mundi samið um það hverjir hefðu bæði heilbrigðiseftirlit og löggæslu á hendi, væri þetta svæði undir einni stjórn.
Virðulegi forseti. Það þarf ekki nema að líta á örfáa staði þar sem ágreiningurinn hefur verið mestur um fasteignir, fasteignagjöld og byggingarrétt. Menn deila um hver eigi að sjá um hvað og nægir að líta heim í kjördæmi félmrh. og sjá ágreininginn sem m.a. hefur verið um Hveravelli. Það nægir til að skynja hvað eftir á að gerast í framtíðinni. Kannski ekki eftir eitt eða tvö eða fimm ár. En í framtíðinni, þegar menn hafa að gert sér grein fyrir því að þeir hafa óumdeilanlega forræði og yfirráð á þessu landi.
Af því að hv. þm. talaði um að verið væri að tryggja eignarrétt: Það er ekki kveðið á um eignarrétt ríkisins á jarðefnum, sem hafa ekki verið hagnýtt hér, í frv. iðnrh. sem hér á eftir að ræða. Og það er óljóst um eignarrétt ríkisins á orku háhitasvæða. Þetta er meðferð stjórnarmeirihlutans hér á Alþingi.