Fjármálaráðherra (Geir H. Haarde):
Herra forseti. Þetta mál hefur ekki borið á góma eftir að ég tók við núverandi starfi. Hins vegar er ljóst eins og fram kom í máli fyrirspyrjanda að alls kyns undanþágur eru frá virðisaukaskattinum.
Fyrirspyrjandi, sem hefur sjálf setið í ríkisstjórn og hefur kynnt sér þessi mál, þekkir að sú ásókn er óendanleg og ekki unnt að verða við henni ef þetta kerfi á að halda gildi sínu sem helsta fjáröflunartæki ríkissjóðs.
Hitt málið sem tengist laxveiðileyfunum er annars eðlis. Á sínum tíma var farið í gegnum það. Það tengist m.a. mati á hlunnindum á viðkomandi jörðum og ég ætla ekki að fullyrða neitt frekar um það á þessu stigi.