[prenta uppsett í dálka] 130. fundur, 122. lþ.
Steingrímur J. Sigfússon:
Herra forseti. Í raun er það svo að þetta frv. gerir ráð fyrir nánast algeru einveldi hæstv. félmrh. Í því felast m.a. þær breytingar að félmrh. á nú að skipa einn fríhendis alla stjórn hins nýja Íbúðalánasjóðs en Alþingi kaus áður stjórn Húsnæðisstofnunar eins og kunnugt er.
Í viðbót við þetta hefur hæstv. ráðherra gífurlega rúmt reglugerðarvald samkvæmt þessu frv. þannig að annað eins hefur sennilega ekki sést í annan tíma og í þriðja lagi er svo í frv. hent út fulltrúum verkalýðshreyfingarinnar þar sem þeir hafa átt aðild að málum í gegnum húsnæðisnefndir sveitarfélaga. Þegar allt er samanlagt, herra forseti, er hér á ferðinni ákaflega ólýðræðislegt fyrirkomulag, mikil valdasamþjöppun undir einum og sama manninum, hæstv. félmrh. Þetta er í stíl við það sem einkavæðingin hefur yfirleitt falið í sér á undanförnum árum að allt vald er fært í hendur eins pólitísks ráðherra.
Þessu mótmæli ég, herra forseti, og greiði atkvæði gegn þessari grein.
