Ásta R. Jóhannesdóttir:
Herra forseti. Það má segja um mig að ég á svo sem ekkert sökótt við forseta en ég vek athygli á því að hæstv. ráðherra svaraði ekki fyrirspurn minni áðan þar sem ég vitna í þessa skýrslu Ríkisendurskoðunar sem er opinbert plagg að sögn ráðherrans. En þar segir að brýnt tilefni sé til þess að bankaráðið rannsaki ýmsa þætti nánar sem tilteknir eru í skýrslunni og athugi hvort draga eigi menn til ábyrgðar. Og ég spyr: Hvers vegna varð ráðherra ekki við þessari kröfu Ríkisendurskoðunar 1996? (SJS: Ráðherrann getur ekki svarað.) Hvers vegna varð hann ekki við þessari kröfu? Í svarinu frá ráðherra kemur fram að ekki hafi þótt ástæða til þess að fara frekar í þetta mál nema frekari upplýsingar komi fram. Ég spyr: Hvað var verið að fela með því að fara ekki að ráðum Ríkisendurskoðunar í þessu máli? Og ég spyr hvort hér hafi einhver verið að hylma yfir eitthvað. Vonandi kemur í ljós hvað hér var á ferðinni þegar við fáum greinargerðina sem hv. þm. Jóhanna Sigurðardóttir hefur kallað eftir því að hún er greinilega nauðsynleg til þess að við getum farið út í efnislega umræðu um þetta stóra spillingarmál í sögu Landsbankans.