Forseti (Guðni Ágústsson):
Í tilefni af orðum hæstv. ráðherra vill forseti taka fram að ráðherrum er ekki tilkynnt um efni óundirbúinna fyrirspurna fyrir fram. Það liggur í orðanna hljóðan að þær eru óundirbúnar. Þetta fer þannig fram að forseti fær fyrirspurnina í hendur. Það er þó fyrst og fremst vinnuskjal hans. Þetta mál kom upp á fundi forsn. í morgun, einmitt vegna þessarar umræðu í fjölmiðlum. Hv. þm. Sturla Böðvarsson minntist á þetta mál og var forsn. sammála um að málið væri vaxið svo sem hér hefur nú verið úrskurðað.