Frsm. meiri hluta (Vilhjálmur Egilsson) (andsvar):
Virðulegi forseti. Það er afar óheppilegt ef ætti að fresta þessu máli. Olíugjaldið var fyrst samþykkt á síðasta kjörtímabili fyrir þinginu 1994--1995 og síðan er búið að fresta þessu aftur. Það er mjög viðurhlutamikið að taka upp svona gjald, m.a. vegna þess að það kallar á miklar fjárfestingar og ekki er hægt að láta þetta dankast svona áfram, það verður að taka um þetta ákvörðun af eða á núna. Nefndin fjallaði lengi og mjög ítarlega um málið og í störfum nefndarinnar komu fram ágætis sjónarmið frá stjórnarandstöðuþingmönnum sem og stjórnarmönnum og niðurstaða meiri hlutans varð að afgreiða málið svona þannig að ekki væri endalaust verið að velta því á undan sér.
Hugmyndin um olíugjaldið sem yrði þá almennt á alla olíunotkun er ekkert fráleit. Málið er hins vegar þannig vaxið að erfitt er að leggja skatt á olíu til fiskiskipa vegna þess að þau geta keypt þessa olíu miklu víðar en á Íslandi. Þannig geta olíuviðskipti átt sér stað á hafi úti á vegum allt annarra aðila en íslensku olíufélaganna. Skip kaupa líka gjarnan olíu í erlendum höfnum þegar þau eru þar og þess vegna er þetta ekki eins einfalt mál og það gæti virst við fyrstu sýn.