[prenta uppsett í dálka] 144. fundur, 122. lþ.
Samgönguráðherra (Halldór Blöndal) (andsvar):
Herra forseti. Ég held að óhjákvæmilegt sé að vekja athygli á því í þessu sambandi að nú er mikið rætt um hvernig hægt sé að haga skattheimtu á flutninga á landi með þeim hætti að það sé í samræmi við þann kostnað sem er af flutningunum, slit vega og annað því líkt. Af þeim sökum er nú mjög í athugun í nálægum löndum hvernig hægt sé að fylgjast með vöruflutningabílum á leið sinni milli landa og innan landa og um leið haft í huga að leggja olíugjaldið niður vegna þess að það er ekki réttlátur skattur og er ekki lagt á í samræmi við það slit sem farartækin valda á vegum.
