Steingrímur J. Sigfússon:
Herra forseti. Verði þessi lækkun á álagningarprósentu tekjuskatts á hagnað fyrirtækja samþykkt þá þýðir það, samkvæmt fskj. með frv., 200 millj. kr. raunlækkun á hlutfallslegum skattgreiðslum fyrirtækja og tekjum ríkissjóðs. Hér er því á ferðinni sérstök gjöf frá ríkisstjórninni til gróðafyrirtækjanna í landinu upp á a.m.k. 200 millj. kr. Reyndar er ástæða til að ætla að þessi gjöf geti orðið meiri í ljósi þess að afkoma fyrirtækja hefur batnað og mörg fyrirtæki í heilum atvinnugreinum hafa nýtt upp öll gömul töp. Því er ljóst að það stefnir í auknar skattgreiðslur fyrirtækja á komandi árum.
Ríkisstjórnin hefur hins vegar ákveðið að í stað þess að fyrirtæki, með batnandi afkomu, leggi meira af mörkum í sameiginlega sjóði landsmanna skuli þeim færð sérstök gjöf, nú mitt í góðærinu, væntanlega til þess að afla sambærilegra tekna og gjöfinni nemur með áframhaldandi aukinni skattlagningu á launamenn. Þessum áherslum í skattamálum mótmæli ég og hvet menn til þess að fella þessa tillögu og halda skattahlutföllunum frekar óbreyttum en lækka þau. Skattalegt umhverfi fyrirtækja á Íslandi er þegar mjög hagstætt.