Guðjón Guðmundsson (andsvar):
Herra forseti. Þessar 1.000 millj. sem hæstv. fjmrh. nefndi eru jú skráð hlutafé í fyrirtækinu. Það er tala sem búin var til þegar fyrirtækið var gert að hlutafélagi og lágu engin vísindi bak við þá tölu. Ég nefndi í máli mínu áðan að nú hefur verðmæti fyrirtækisins verið metið og það er 788 millj. mínus 324 millj. sem eru lífeyrisskuldbindingar, eða með öðrum orðum 462 millj. kr. nettó. 25% af því eru 115 millj., af því fer eitthvað í kostnað, og þá er nú orðið ansi lítið eftir þegar tillit er tekið til þess að þetta mun væntanlega leiða til verðhækkunar á sementi.
Ég ætla svo ekki að fara út í frekari útlistanir um trúarbrögð eða ekki trúarbrögð. Mér fannst satt að segja þessi útskýring míns ágæta hæstv. fjmrh. dálítið langsótt.