[prenta uppsett í dálka] 5. fundur
Jón Kristjánsson (andsvar):
Herra forseti. Ég hélt að hv. þm. Guðrún Helgadóttir hefði það mikla starfsreynslu í fjárln. að hún þyrfti ekki að hrökkva við þó að talað væri um 90 millj. í húsasviðgerðir. Í Reykjavík hafa verið gerð upp myndarleg hús á vegum ríkisins sem hafa kostað um 70 millj. ef ég man rétt. Ég veit ekki hvað það er framreiknað núna. Það hús er ráðherrabústaðurinn vestur í Tjarnargötu þannig að það er einfaldlega svo að ef á að gera við þessi hús svo að það hrynji ekki ofan í höfuðið á þeim sem þar eiga að vera inni, hvort sem það eru væntanlegir sendiherrar eða aðrir, þá getur þetta farið upp í þessar upphæðir. Ég vildi aðeins upplýsa þetta.
