Forseti (Ragnar Arnalds):
Áður en gengið er til dagskrár fer fram utandagskrárumræða um stefnuna í heilbrigðismálum. Umræðan fer fram að ósk stjórnarandstöðunnar. Málshefjandi er hv. þm. Margrét Frímannsdóttir og hæstv. heilbrrh. Ingibjörg Pálmadóttir verður til andsvara.
Samkomulag er milli þingflokkanna um fyrirkomulag umræðunnar sem verður þannig: Í fyrstu umferð hafa málshefjandi og talsmenn þingflokka átta mínútur en ráðherra tólf mínútur. Í annarri umferð hefur einn ræðumaður frá hverjum þingflokki fimm mínútur hver og við lok umræðunnar hafa málshefjandi og ráðherra fimm mínútur hvor. Andsvör verða leyfð á ræðumenn í fyrstu umferð aðra en málshefjanda og ráðherra og á ræðumenn í annarri umferð. Aðeins einn þingmaður fær að veita andsvar hverju sinni, einu sinni í eina mínútu, og ræðumaður svarar og hefur eina mínútu. Samkvæmt þessu er gert ráð fyrir að umræðan standi í rösklega eina og hálfa klukkustund, þ.e. til kl. rúmlega tólf.