Heilbrigðisráðherra (Ingibjörg Pálmadóttir) (andsvar):
Virðulegur forseti. Vegna þess síðasta sem hv. þm. sagði að við værum hætt að lækna og líkna og værum sífellt að tala um peninga --- auðvitað er verið að lækna og líkna en við höfum snúið umræðunni við. Sífellt tölum við um niðurskurð þegar við erum í raun að bæta fjármunum við. Bara á þessu kjörtímabili hefur 4,6 milljörðum að raungildi verið bætt við útgjöld til heilbrigðis- og tryggingamála þannig að við erum sífellt að snúa þessari umræðu við. Hv. þm. sagði að það væri miklvægt að bæta þjónustu við börn --- það erum við að gera með stórhækkuðum umönnunarbótum til langsjúkra barna og með byggingu sjúkrahúss fyrir langveik börn. Hv. þm. spurði: Hvar er stefnan? Það er skýr stefna í sjúkrahúsmálum. Það er skýr stefna í heilsugæslumálum og það er skýr stefna í forvarnamálum. En auðvitað hljótum við alla tíð að þurfa að endurskoða alla þessa hluti sem eru í svo hraðri þróun eins og menn þekkja.