Össur Skarphéðinsson:
Herra forseti. Ég verð að segja að deilurnar í þingflokki Sjálfstfl. eru farnar að brjótast út í þingsölum með undarlegum hætti. Hv. fyrirspyrjandi er pirraður út í hæstv. sjútvrh. fyrir að hann hefur vogað sér að leggja fram frv. sem á að takmarka kvótaeign eða setja hámark á kvótaeign einstakra fyrirtækja. Hann hefur væntanlega rifist í hæstv. ráðherra í þingflokknum en til þess að pirra menn frekar þá leggur hann fram frumskóg af fyrirspurnum sem lúta að því að leiða fram hver markaðshlutdeild ráðandi fyrirtækja er í hinum ýmsu greinum.
Nú er það svo, herra forseti, að ég hef fullan skilning á þeirri ánægju sem felst í því að pirra hæstv. sjútvrh. öðru hverju. En væri ekki Sjálfstfl. miklu hentara að reyna bara að útkljá þessi deiluefni sín í eigin þingflokki og láta okkur í friði hérna uppi?