[prenta uppsett í dálka] 23. fundur
Iðnaðarráðherra (Finnur Ingólfsson):
Herra forseti. Fyrirspurn hv. þm. Tómasar Inga Olrich á þskj. 225 er svohljóðandi: Hefur ráðherra upplýsingar um markaðshlutdeild tveggja stærstu fyrirtækja landsins í öl- og gosdrykkjaframleiðslu?
Samkvæmt skýrslu Samkeppnisstofnunar frá í desember 1994, sem áður er vitnað til varðandi stjórnunar- og eignatengsl í íslensku atvinnulífi, voru tvö stærstu fyrirtæki á þessum markaði árið 1993 Vífilfell hf. og Ölgerðin Egill Skallagrímsson ehf. Nokkrar hræringar hafa verið á þessum markaði síðan. Félag sem tengist Vífilfelli á Víking hf. og Sól hf.
Í fyrrgreindri skýrslu er getið um markaðshlutdeild einstakra fyrirtækja. Síðan sú skýrsla var unnin hafa orðið breytingar á markaðnum þannig að hlutfallstölur sem þá giltu eiga ekki lengur við að öllu leyti. Ekki hefur verið aflað upplýsinga um veltu þessara fyrirtækja á þessum markaði svo sjá megi markaðshlutdeild tveggja stærstu fyrirtækjanna í dag.
Sem svar við annarri spurningu hv. þm. á þskj. 225, þá vil ég vísa til þess svars sem ég var með áðan varðandi aðra fyrirspurn á þskj. 224 sem efnislega hljóðar nákvæmlega eins.
