Jóhanna Sigurðardóttir (andsvar):
Herra forseti. Hæstv. ráðherra svaraði ekki spurningu minni um það hvort þessi breyting hefði áhrif á sérstaka uppbót í tryggingakerfinu þar sem tekið er tillit til verulegs húsaleigukostnaðar hjá elli- og örorkulífeyrisþegum. Hann svaraði ekki heldur spurningu um þær breytingar sem er verið að gera þar sem í stað orðsins tryggingabætur er talað um að átt sé við bætur almannatrygginga. Er verið að fella brott að barnabætur hafi áhrif til skerðingar á húsaleigubótum?
Mér komu satt að segja mjög á óvart orð hæstv. ráðherra hér áðan. Hann virðist engar áhyggjur hafa af því, hæstv. forseti, þó fjórðungur þeirra sem nú eru í leiguíbúðum hjá sveitarfélögum, 550 manns, falli bara brott úr kerfinu, fái hvorki niðurgreitt leiguhúsnæði né húsaleigubætur. Samt getur þetta verið stór hópur sem rétt skríður yfir tekjumörkin en það þarf allt í einu að standa uppi með að borga 15--20 þús. kr. hærri leigu. Ég er bara gáttuð, herra forseti, á hæstv. ráðherra. Auðvitað er hægt að breyta þessari stöðu og ráðherra getur haft áhrif á hana ef framlag til sveitarfélaganna við þessa breytingu verður ekki 200 milljónir eins og nú er áformað heldur 400 milljónir sem var samkomulag um þegar þetta kerfi fór af stað. Þá gætu sveitarfélögin bætt fólki upp þann mismun sem myndast nú.
Varðandi skattfrelsið, þá finnst mér það uppgjöf hjá hæstv. ráðherra þegar hann segir að það sé allt í lagi að þetta skuli vera skattskylt áfram. Ég nefndi það að fólk sem er með tekjur undir 900 þús. kr. sem er nú ekki tekjuhátt fólk, þarf að borga núna 16 þús. kr. í þennan mismun en mundi þurfa að borga 12 þús. ef tekjurnar væru ekki skattskyldar. Hér er því um verulegan mun að ræða. Það á ekki bara að horfa á þann hóp sem er undir skattfrelsismörkum heldur hinn sem er rétt fyrir ofan og er ekkert annað en lágtekjufólk. Fólk með 700 þús. til 1 milljón er ekkert annað en lágtekjufólk.
Í lokin, herra forseti. Það er ekki búið að ná neinu samkomulagi við sveitarfélögin. Það á að reyna að gera það í næstu viku. Ég vil spyrja hæstv. ráðherra: Ef ekki næst samkomulag við sveitarfélögin um þessi fjárhagslegu samskipti og um skattfrelsi bótanna, mun hæstv. ráðherra, þrátt fyrir það, knýja þetta frv. í gegnum þingið?