Jóhanna Sigurðardóttir (andsvar):
Herra forseti. Ég vil þakka hæstv. ráðherra fyrir svörin og fagna því að hann telji kannski ástæðu til þess að fjmrn. og Ríkisendurskoðun setjist yfir þessi nýsettu lög frá því í vor og finni þá leiðir og úrræði sem gagnast betur en raun ber vitni að þau geri.
Ég fagna því líka að hæstv. ráðherra útilokar ekki að skoða það --- að vísu sagði hann: ,,án allra skuldbindinga`` --- að fella brott úr dómsmálagjöldunum og hækkun á þeim það sem snýr sérstaklega að skuldugum heimilum í landinu og hvet nefndarmenn í efh.- og viðskn. til þess að skoða það sérstaklega og veita athygli þessari yfirlýsingu hæstv. ráðherra að hann útiloki ekki að skoða það sérstaklega að fella niður þá gjaldtöku í dómsmálagjöldunum sem snýr sérstaklega að skuldugum heimilum.
Ég held að það væri mjög til bóta og til þess fallið að ná frekari sátt um frv. ef hæstv. ráðherra væri tilbúinn að skoða það sérstaklega í samráði við nefndina að fella þessa þætti brott enda hefur ríkið þegar verulegar tekjur af aðfarargjöldum og gjöldum vegna nauðungarsölu eða um 400--500 milljónir. Ég fullyrði og ráðherrann verður þá að svara, ef hann mótmælir því, að þessar 400--500 milljónir er langt umfram þann kostnað sem er af nauðungarsölum og aðfarargerðum.
Af því hæstv. ráðherra nefndi árið 1991, þegar sú sem hér stendur átti sæti í ríkisstjórn, þá var vissulega fjallað um hækkun á dómsmálagjöldum. Ég vona að hæstv. ráðherra muni að ég mótmælti því mjög harðlega þegar fara átti út í hækkun á dómsmálagjöldum. Ég gerði sérstaka grein fyrir því og kom með tillögur á móti í staðinn fyrir að fara þá leið að hækka gjaldtöku á skuldugum heimilum í landinu. Ég vildi halda þessu til haga fyrst hæstv. ráðherra sá ástæðu til þess að nefna þetta sérstaklega.