Félagsmálaráðherra (Páll Pétursson):
Herra forseti. Ég vil byrja á því að þakka hv. fyrirspyrjanda fyrir að hefja þessa umræðu og koma með þessa fyrirspurn, en ég hef áður greint frá því í umræðum á þinginu að ég hafi áhuga á því að endurskoða jafnréttislögin. Ég mun setja vinnu í gang við þessa endurskoðun. Ég skal ekki segja hvort ég kem því í verk fyrr en eftir áramót. Mér finnst sú ábending hv. þm. ágæt um að byrja verkið með því að hafa hugarflugsfund.
Ég hef unnið að endurskoðun framkvæmdaáætlunar um jafnréttismál og henni verður væntanlega dreift á borð þingmanna í dag eða í síðasta lagi á morgun. Við höfum lagt mikla vinnu í þessa endurskoðun og einmitt einn þátturinn var sá að ég efndi til funda í öllum kjördæmum til að koma af stað umræðu um jafnréttismál og til þess að reyna að fá fleiri inn í umræðuna og safna hugmyndum og það gafst afar vel. Ég tel því að þetta séu skynsamleg vinnubrögð. Við erum að vísu með jafnréttislög nú sem ekki eru mjög gömul. Þau eru frá 1991. En í ljósi breyttra tíma, því viðhorfin til jafnréttismála hafa breyst töluvert og vinnubrögðin frá 1991, þá tel ég fyllilega tímabært að skoða þessi lög. Það eru ýmis atriði sem eru þess eðlis að það er eðlilegt að endurskoða þau.
Norðmenn og Danir hafa á undanförnum árum endurskoðað sín jafnréttislög. Þeir fara nokkuð aðrar leiðir. En við hljótum líka að taka mið af því hvernig þeir hafa unnið að sinni endurskoðun. Nú er þessi málaflokkur þess eðlis að þó menn hafi góð lög út af fyrir sig, þá dugir það ekki til. Við höfum ákaflega ströng ákvæði í okkar stjórnarskrá. Lagaleg staða jafnréttismála er betur tryggð hér á landi en víðast hvar annars staðar. En jafnréttismál eru öðrum þræði hugarfar. Það eru öðrum þræði viðhorf í hinu daglega lífi og samverkan margra þátta og allra aðila sem verður til að koma ef þetta á að komast í lag. Það þarf að skoða jafnréttislögin með tilliti til stjórnsýslulegrar stöðu. Það þarf að skoða kærunefndina og samsetningu Jafnréttisráðs, samskipti skrifstofu jafnréttismála og félagasamtaka og aðila vinnumarkaðarins. Það er spurning hvernig þessu er haganlegast fyrir komið og það er umhugsunarefni hvort félagasamtök eigi að eiga beina aðild að ákvörðunum ráðsins. Það getur e.t.v. verið eðlilegra að ráðið fæli félagasamtölum ákveðin verkefni og borgaði þá fyrir þau.
Það er mikið atriði og eiginlega grunntónninn í þessu, að samþætta jafnréttismálin við alla umræðuna, samþætta þetta í alla ákvarðanatöku.
Eins er ástæða til þess að skoða 12. gr. jafnréttislaga sem kom hér til umræðu fyrir nokkrum dögum síðan. Mér finnst umhugsunarefni hvort hægt er að skylda frjáls félagasamtök, hvort stjórnvöld geta skyldað frjáls félagasamtök til að óska tilnefninga með þessum eða öðrum hætti. Stjórnvöldin geta tekið á sig þessar skyldur og hugsanlega sveitarfélög og opinberar stofnanir. En er hægt að skylda Kvenréttindafélagið t.d. til þess að gæta þeirra ákvæða sem fyrir er mælt í 12. gr.? Svona eru ótal atriði sem ég tel að menn þurfi að skoða. Við þurfum að gefa okkur einhvern tíma til að vinna þetta verk. Ég vænti þess að fyrir lok kjörtímabilsins geti ég lagt hér fram frv. og væntanlega fengið afgreidda endurskoðun á jafnréttislögunum.