Rannveig Guðmundsdóttir:
Hæstv. forseti. Það þarf sterk bein til að þola góða daga, stefnufestu og sjálfsaga til að stjórna í góðæri. Við þessi fjárlög gengur núverandi ríkisstjórn undir próf hvort hún hefur festu og aga sem þarf til að varðveita stöðugleikann. Til að koma í veg fyrir hækkandi gengi, versnandi samkeppnisstöðu, vaxandi viðskiptahalla og hækkandi vexti hefði þurft að afgreiða fjárlög með nálægt 5 milljarða tekjuafgangi. Hver er svo útkoma á prófinu? Sala eigna, áfallnar lífeyrisskuldbindingar, uppsöfnuð fjárvöntun sjúkrahúsa og niðurskurður í velferðarkerfi sýna bullandi fjárvöntun þrátt fyrir aukna veltu og neyslu sem mun gefa milljarða tekjuauka í ríkissjóð. Það er verið að bjóða heim hættu á verðbólgu, skuldasöfnun og versnandi kaupmætti í miðju góðærinu.
Þessi ríkisstjórn, ríkisstjórn biðlistanna, virðist ekki hafa þau sterku bein sem þarf. Hún er fallin á prófinu. Þingflokkur jafnaðarmanna mun sitja hjá við afgreiðslu fjárlaganna.