Sjávarútvegsráðherra (Þorsteinn Pálsson) (andsvar):
Herra forseti. Það kom ekki á óvart að hv. þm. skyldi lýsa því yfir að að hennar mati væri rétt að gera víðtækari breytingar á frv. og það væri stefna stjórnarandstöðunnar að það skyldi gera og það væri afstaða stjórnarandstöðunnar að dómur Hæstaréttar hefði þá merkingu að einnig ætti að gera breytingar á 7. gr. fiskveiðistjórnarlaganna. Ekkert af þessu kom á óvart.
Hitt kom mjög á óvart að í ítarlegri ræðu skyldi talsmaður stjórnarandstöðunnar í umræðunni ekki víkja einu orði að því að þessum sjónarmiðum ætti að fylgja eftir með tillöguflutningi á Alþingi þannig að þingið gæti tekið afstöðu til ólíkra kosta í þessu efni. Ég segi fyrir mitt leyti, ég væri mjög fús til þess og hefði mikinn áhuga á því að fá að ræða þá kosti sem stjórnarandstaðan segist hafa í málinu. En því miður kom ekki fram í ræðu hv. þm. að það ætti að gefa þinginu kost á að ræða þessar mismunandi útfærslur. Ég vildi því fá að spyrja hv. þm.: Hvers vegna hefur þessum málflutningi ekki verið fylgt eftir með tillöguflutningi sem Alþingi og þjóðin geta þá tekið afstöðu til?