Sigríður Jóhannesdóttir:
Hæstv. forseti. Það fór ekkert fram hjá okkur sem sitjum í fjárln. þingsins hversu mikið vandinn brennur á sveitarfélögunum í landinu. Því hefur áður verið lýst í umræðunni að við sátum í nærfellt tvo mánuði í haust og hlustuðum á sveitarstjórnarmenn og það var undantekning ef ekki voru meiri háttar fjárhagsvandræði á ferð.
Svo gerast þau undur og stórmerki að sveitarfélag sem ekki hafði nýtt sína útsvarsprósentu hækkar hana og þá rís upp sjálfur forsrh. þjóðarinnar og hneykslast alveg ofan í tær á þvílíku framferði. Ég verð að segja að mér finnst það fyrst og fremst hneykslanlegt þegar sveitarfélög fara að safna stórfelldum skuldum án þess að nýta löglega tekjustofna. Það er fyrst og fremst hneykslanlegt.
Það var vandræðamál fyrir nokkrum árum þegar aðstöðugjöldin voru afnumin án þess að nokkuð kæmi í staðinn. Það verður að finna upp einhverja nýja tekjustofna fyrir sveitarfélögin, eitthvað annað en þjónustugjöld. Þvert ofan í það sem áður hefur verið sagt í umræðunni þá er ég ekki mjög hrifin af þjónustugjöldum sem skattstofni. En ég held að það verði að finna upp nýja tekjustofna.
Og svo að lokum af því að ég sé að tími minn er að verða búinn. Grunnskólinn var fluttur til sveitarfélaganna með alls ónógum fjárframlögum. Það var reiknað út á mjög hagstæðum tíma fyrir ríkið, óhagstæðum fyrir sveitarfélögin, hversu mikið ætti að fylgja með. Kennaralaun voru t.d. í sögulegu lágmarki og allar kröfur til grunnskólans hafa breyst mjög síðan þessir samningar voru undirritaðir. Það er því knýjandi nauðsyn að þeir verði endurskoðaðir strax.