Hjálmar Árnason:
Herra forseti. Ég vil taka undir það að vel hafi tekist með útboðsleiðina sem valin var. Í rauninni þarf ekki að kanna það frekar. Nú þegar liggur fyrir hve mörg störf hafa þar orðið til. Það vekur líka athygli að í fyrsta sinn hefur verið gengið frá fjármögnun á Flugstöð Leifs Eiríkssonar.
Ég vil taka undir það sem hv. þm. og fyrirspyrjandi, Einar K. Guðfinnsson, nefndi þegar hann vakti athygli á framgöngu hv. þingmanna jafnaðarmanna þegar útboðið átti sér stað. Þá kom hver á fætur öðrum og gekk jafnvel inn í Flugstöð Leifs Eiríkssonar og boðaði að þar með yrði atvinnuleysi, fólk mundi missa störf sín og þar fram eftir götunum. En eins og spáð var þá hefur annað komið á daginn. Störfum hefur fjölgað og rekstrargrunnur stöðvarinnar er treystur.