Félagsmálaráðherra (Páll Pétursson):
Herra forseti. Ég væri nú hræddari við að sumir þeir sem ég mundi skipa í nefndina núna ættu ekki afturkvæmt á þingið eftir kosningar. Ég er hræddari um það en nýju þingflokkana. Ég er ekki svo hræddur um að þeir komi til með að eiga mikla viðdvöl á næsta kjörtímabili.
Á það er einnig að líta að þessi nefnd verður með fulltrúa frá sveitarfélögunum. Ég geri ráð fyrir því að þar verði breidd í pólitísku sjónarmiðum. Sveitarstjórnarmennirnir eru líka stjórnmálamenn þó þeir séu ekki á Alþingi. Ég teldi hins vegar óheppilegt að hafa þessa nefnd mjög fjölmenna.