[prenta uppsett í dálka] 65. fundur, 123. lþ.
Gísli S. Einarsson:
Herra forseti. Ég beini máli mínu til hæstv. dómsmrh. og spyr um málefni sem að margra mati er að þróast óheillavænlega á Íslandi.
Í fyrsta lagi. Eru af hálfu dómsmrn. einhverjar aðgerðir fyrirhugaðar gegn klámiðnaði á Íslandi?
Í öðru lagi. Hafa grunsemdir um vændi verið rannsakaðar?
Herra forseti. Ég bendi á að frá því hefur verið greint í fjölmiðlum að 60--90 erlendar nektardansmeyjar séu starfandi á veitingahúsum hérlendis. Einnig má nefna þann fjölda auglýsinga sem birtast daglega í DV um alls kyns þjónustu á þessu sviði.
Ég vil, herra forseti, fá leyfi til að láta þessa síðu liggja hér í ræðustólnum til upplýsingar fyrir hæstv. dómsmrh., ef hann hefur ekki horft á eða fylgst með því sem er að gerast í þessum málum. Ég vona að tími gefist fyrir hæstv. dómsmrh. til að gefa svör í þessu máli, sem er mjög alvarlegt og tengist eiturlyfjaneyslu sem er vaxandi og mikið vandamál í höfuðborginni og víðar á landinu.
