Sturla Böðvarsson:
Herra forseti. Ég vil þakka hv. fyrirspyrjanda fyrir fyrirspurnina. Það er ekki óeðlilegt að hv. þm. spyrji um þessi verkefni í Dalasýslu, ekki síst með tilliti til þeirra verkefna sem bíða hans innan skamms. Ég þakka jafnframt hæstv. forsrh. fyrir áhuga hans á þessu máli fyrr og síðar. Eins og fram kom hjá hæstv. forsrh. hefur Alþingi tekið myndarlega á þessu máli og orðið við óskum Dalamanna, bæði við afgreiðslu fjárlaga 1998 þegar veittar voru 7 millj. kr. til þessarar uppbyggingar og með 20 millj. á þessu ári.
Með þessum fjárframlögum er ljóst að þær stórhuga áætlanir í fornleifarannsóknum og uppbyggingu aðstöðunnar á staðnum sem heimamenn hafa lagt á ráðin um, munu ná fram að ganga fyrir árið 2000. Mér sýnist því engin ástæða til að kvíða því, enda eiga að vera til fjármunir þess að vinna verkið.