[prenta uppsett í dálka] 71. fundur, 123. lþ.
Kristín Halldórsdóttir:
Herra forseti. Eins og kunnugt er og tilkynnt var héðan úr þessum ræðustóli sl. föstudag hafa orðið miklar breytingar á skipan þingflokka á hv. Alþingi. Þrír þingflokkar hafa verið lagðir niður, leystir upp og einn nýr stofnaður í þeirra stað. Af þeim sökum hefur sú sem hér stendur verið án heimilisfangs undanfarna þrjá daga en breytingar verða þar á þar sem ég ákvað að sækja um aðild að þingflokki óháðra og hef fengið þar góðar móttökur og jákvæð viðbrögð.
Þessi skipan kemur eflaust fáum á óvart þar sem sá þingflokkur er að stærstum hluta skipaður mönnum sem ásamt mér hafa staðið að myndun nýs stjórnmálaafls, Vinstri hreyfingarinnar -- græns framboðs.
Það tilkynnist því hér með, herra forseti, að héðan í frá er heimilisfang mitt hjá þingflokki óháðra.
