Utanríkisráðherra (Halldór Ásgrímsson) (andsvar):
Herra forseti. Í sambandi við samantekt á því hvernig EES-samningurinn hefur reynst þá vil ég ekki útiloka að farið verði í slíka athugun. Utanrrn. hefur hins vegar í starfi sínu lagt megináherslu á að kynna samninginn og þá möguleika sem Íslendingar eiga í að notfæra sér hann. Við höfum nýlega gefið út upplýsingabækling um möguleika fólks, ekki síst ungmenna, til starfsréttinda á Evrópska efnahagssvæðinu og til þess að mennta sig. Við ætlum að halda áfram á því sviði. Við höfum komið upp fullkominni vefsíðu um þessi mál og teljum reyndar að við séum lengra komnir í þessu sambandi en ýmsar aðrar þjóðir.
Í sambandi við Alþingi og Evrópumálin þá tek ég undir með hv. þm. Ég benti á það í þingflokki mínum, í umræðum um nefndaskipan á Alþingi, að þetta mál þyrfti að athuga sérstaklega, í sambandi við skipan þingsins í nefndir. Ég tel að Evrópumálin eigi þar að vera ofarlega á baugi.