[prenta uppsett í dálka] 72. fundur, 123. lþ.
Árni M. Mathiesen (andsvar):
Herra forseti. Í þessu tilfelli er ekki verið að tala um persónulegar skoðanir, heldur er verið að tala um stefnur stjórnmálahreyfinga sem vilja láta taka sig alvarlega í íslenskri pólitík og telja sig vera þess umkomnar að takast á við ábyrgð á þessum vettvangi. Þess vegna skiptir máli að menn viti hver stefnan er. Ég heyri það mjög skýrt á hv. þm. Sighvati Björgvinssyni að hann telur að stefna Samfylkingarinnar sé sú að vera áfram í NATO. En frambjóðandinn í Reykjavík, sem ég vitnaði til, telur að Samfylkingin hafi ekki tekið afstöðu til málsins og ætli ekki að taka afstöðu til þess fyrr en endurskoðun á öryggisstefnu NATO er lokið sem ekki verður fyrr en á miðju sumri, eftir kosningar. Þá ætla ég að fá að láni frasa frá hv. þm. Sighvati Björgvinssyni: Annaðhvort hefur Samfylkingin þá stefnu að vera í NATO eða hún hefur þá stefnu að vera ekki í NATO.
