Menntamálaráðherra (Björn Bjarnason):
Herra forseti. Það hefur verið unnið að gerð frv. um Tækniháskóla Íslands á grundvelli rammalöggjafarinnar um háskólastigið. Hins vegar er það rétt hjá hv. þm. að það hefur ekki verið lagt fram á Alþingi. Það hafa einnig verið miklar umræður um að mjög æskilegt væri að endurskoða nám í tækni- og verkfræði og huga að því hvort aukið samstarf eigi að verða á milli skóla á því sviði og það er meðal þess sem ég tel að þurfi að skoða betur áður en hv. Alþingi er kynnt frv. til laga um Tækniháskóla Íslands.