Guðmundur Hallvarðsson:
Herra forseta. Ég vil þakka fyrirspyrjanda fyrir þær spurningar sem hún lagði fram. Í framhaldi af því sem hv. 16. þm. Reykv. kom inn á varðandi ofbeldi, þá getur það legið í fjölmörgu öðru en því sem ætla má að hér sé verið tala um, þ.e. líkamlegt ofbeldi eða andlegt. Kem ég þá kannski að því að ég hef í nokkur ár flutt þáltill. um umboðsmann aldraðra, en til hans gæti leitað starfsfólk öldrunarstofnana vegna ofbeldis sem kannski felst í því að krafist er eignaumskipta, ef ættingjar krefjast jafnvel umráðaréttar yfir fjármunum. Þess eru jafnvel dæmi að leitað hafi verið til starfsfólks á öldrunarheimilum eða hjúkrunarheimilum og það beðið um vottun á gögn vegna fjármála eða vegna eignaskipta. Málið er umfangsmikið, mjög flókið og mjög erfitt en vissulega er full ástæða til þess að ráðuneytið og hæstv. heilbrrh. taki á því og leggi nokkra vinnu í það að greiða úr þessu vandamáli sem er mjög víðfeðmt.