Pétur H. Blöndal:
Herra forseti. Eins og kom fram í ræðu hv. frsm. um þetta mál stend ég sem fulltrúi í iðnn. að þessu frv. Það er flutt til samræmis við sambærilega breytingu á lögum um Rarik. Þetta frv. er reyndar mjög skrýtið eins og sambærileg ákvæði í lögum um Rarik. Hér er löggafarsamkundan að gefa stjórn ákveðins fyrirtækis heimild til að kaupa hlut í öðru fyrirtæki. Þetta er náttúrlega mjög skrýtið en er víst nauðsynlegt þar sem þessi geiri er allur saman rekinn með lögum frá Alþingi.
Herra forseti. Ég stend að þessu frv. í trausti þess að fylgt verði þeirri áætlun ríkisstjórnarinnar að auka samkeppni í orkumálum, breyta eignarformi og helst eignarhaldi í orkugeiranum. Ég treysti því að tekin verði upp hlutafélagavæðing á þessum fyrirtækjum. Landsvirkjun jafnvel skipt upp. Helst vildi ég einkavæða allt heila batteríið, því þetta er stærsti geirinn í íslensku atvinnulífi sem enn er fastur í höndum opinberra aðila.