Sighvatur Björgvinsson:
Herra forseti. Við jafnaðarmenn vorum andvígir Kvótaþinginu þegar það var leitt í lög og vöruðum við áhrifum þess. Þær viðvaranir hafa nú komið fram. Vertíðarflotinn er að deyja. Landvinnslan á í miklum erfiðleikum. Þetta frv. hefur legið fyrir Alþingi í meira en viku. Ítrekaðar tilraunir til að fá það rætt hafa ekki borið árangur. Nú hafnar meiri hluti Alþingis að eina tillagan sem fram hefur verið lögð á þingi til þess að leysa vanda þessara einstaklinga, fjölskyldna og fyrirtækja fáist rædd. Það segir sitt um efnislega afstöðu meiri hlutans til málsins. Ég segi já.